KALIBO, Aklan—Dead on arrival nga gindaea sa Altavas district hospital ro sangka 17-anyos nga dalagita matapos nga magbigti-patay sa banwa it Batan.
Suno sa Batan PNP, samtang nagatan-aw it TV ro anang mga ginikanan hay nagtindog sigon ro anang nanay ag nakaagi sa kwarto it anang onga kon sa siin dikara hay nakalingot imaw sa kwarto ag nakit-an nga nakabitay eon ro dalagita.
Sa inisyal nga imbestigasyon it pulisya, ginpuna eamang sigon it anang ama ro dalagita kon ham-an it uwa gihapon natapos ro anang module ag ginapatihan nga nagsunggod ro biktima.
Uwa man sigon raya it problema sa pamilya nga makabig nga naging rason it anang hinali pag-utas sa anang kaugalingon nga kabuhi.
Nauna eon nga ginpaathag sa Bombo Radyo Kalibo ni Dr. Jeanette Ortega, sangka Psychiatrist ag Mental Health Advocate nga makabulig it mabahoe sa mga nagaexperiensiya it depresyon ro pakikipag-istorya sa ibang tawo, pag-angkon it recreational activities, healthy ag positive lifestyle, ag eabaw sa tanan ro support group halin sa mga masaligan nga amigo ag atensyon it pamilya.
Indi sigon makabulig sa pagsolbar it problema ro aeak ukon illegal nga droga.
Makabulig man suno kana sa paglikaw sa depression ro pag-exercise bangud nga ginapaguwa kara ro mga endorphins ukon ro “joy hormones”.
Samtang para sa mga tawo nga nakaexperiensiya it depresyon, pwedeng magtawag sa Hopeline it DOH sa numero (02) 804-4673 ag 0917-5584673 para sa counselling ag iba pang impormasyon.
