Pormal eon nga ginbaton it Provincial Government it Aklan ku adlaw it Lunes, Mayo 18, ro No Objection Letter 1 halin sa Department of Agriculture–Philippine Rural Development Project para sa rehabilitsyon it Poblacion-Tigbawan-Alas-as-Mamba-Medina-Panipiason Farm-to-Market Road.
Suno kay Roger Esto, provincial planning officer it probinsya, raya hay mabuhay eon nga damgo nga gina-tinguhaan nga matigayon eabi eon para sa mga pumueuyo it banwa it Madalag.
Ro nasambit nga masobra 17km rehabilitasyon hay ginatanyang gaabot sa P629 milyon pesos, eakip eon kara ro daywang bilog nga tulay.
Paathag ni Esto, 2017 pa nanda raya nga ginsumite apang bangud sa mahaba nga proseso, kaibahan eon ro pag-appraise sa mga tag-iya it eugta nga maagyan, ginakalipay sigon nanda nga ibalita nga makaron hay may mabahoe eon raya nga progreso.
Ginakabig man raya nga pinakamabahoe nga proyekto sa bilog nga Pilipinas.
Dugang pa nana, tuyo it nasambit nga proyekto nga mapadali ag euwas nga ma-byahe it mga lokal nga mangunguma it nasambitan nga banwa ro andang nagkaeain-eain nga produkto paadto sa merkado.
