Ginausoy ro 18-anyos nga residente it Barangay Pagsanghan, Banga, Aklan matapos nga mag-report ro anang pamilya nga missing imaw sa Cainta, Rizal.
Suno kay Damverosa Andrade, nanay it missing nga biktima, nakabaton sanda it impormasyon adlaw it Martes, Agosto 11, 2026 nga naghalin ro anang unga mga alas-12 it gabi it Lunes ag uwa eon raya nakabalik. Naka-chat ro biktima sa anang ina nga gapangayo imaw it bulig.
Sa mensahe, ginhambae sigon kara nga buligan imaw ni Mama na hay kasakit sakit eon sigon anang ginabatyag ag indi eon nana masarangan.
Ginasugid man sigon it biktima nga ginkulong imaw apang indi eon nana madumduman ro lugar bangud nga maeayo eon sa andang ginhalinan.
Suno sa biktima, naghalin sanda alas-12 it gabi ag alas-3 eon it aga-aga nag-abot sa isaeang ka lugar nga indi uwa nana masayran. Gin-alegar man it biktima nga gindaea imaw sa isaeang ka abandonadong baeay ag ginkulong sa sangka kwarto.
Ro eaeaki nga kaibahan sigon nana hay may ginhueat pa gid nga tatlo pa ka eaeaki, ngani ap’at tanan ro mga eaeaki nga una sa lugar.
Base man sa pahayag it ina it biktima, gina-alegar nga ginasakit imaw it ap’at ka eaeaki samtang ginapangayo nanda ro ana nga cellphone.
Ginhambae man ni Andrade nga una pa eamang nga nagkita ro anang unga ag ro eaeaki nga nagdaea kana sa lugar.
Padayon pa ro pag-usoy sa biktima ag pag-imbestiga sa insidente it mga otoridad.
