KALIBO, Aklan—Nakataeanang batunon it lokal nga gobyerno it Malay ro kapin sa 180 units it Electric Tricycle (E-trikes) nga libreng ginta-o it Department of Energy (DOE) para sa isla it Boracay.
Suno kay OIC Malay Mayor Abram Sualog, raya hay kasunod it mandato it Department of Environment and Natural Resources (DENR) nga makaangkon it total phase-out sa mga de-gasolinang tricycle sa Boracay ag pagabayluhan it mga e-trikes.
Nasayuran nga nagtapos eon ro palugit nga ginta-o it DENR sa mga tricycle driver, apang na-extend hasta sa mag-abot ro 180 nga mga bag-ong e-trikes.
Suno sa alkalde nga sa kabilugang 540 nga mga tricycle nga nagabyahe sa Boracay, 270 pa eamang ro naka-avail it mga e-trikes.
Prayoridad nga mataw-an it libreng e-trikes ro mga qualified nga driver ag may prangkisa ag manaming record.
Dugang pa ni Sualog nga haom eon ro mga e-trikes nga ipadaea sa LGU-Malay halin sa Batangas ag mismong ro resolusyon it Sangguniang Bayan (SB)-Malay ro ginahueat sa makaron.
