KALIBO, Aklan — Nagtuga it kahadlok ag kakoeba sa sangka daeaga matapos nga gina-alegar nga ginhold-up it daywang ka mga suspek nga nagpakuno-kuno nga pulis sa Capitol Site, Brgy. Estancia, Kalibo, Aklan.
Nakilaea ro biktima nga si Meradel Baltazar, 19, residente it Brgy. Mabilo, Kalibo.
Nabueo sa biktima ro sangka maeahaeon nga cellphone, P2,000 nga cash ag yabe it anang motorsiklo.
Base sa inisyal nga imbestigasyon it Kalibo Police Station, sakay it anang motorsiklo ro biktima kon siin pag-abot sa nasambit nga lugar hay may nag-overtake kana nga motorsiklo sakay ro daywang owa nakilaea nga mga kaeaeakin-an kon siin insigida sigon imaw kara nga ginpapundo.
Nagpakilaea pa suno kana ro mga suspek nga pulis nga nagapatigayon it checkpoint.
Kadungan kara ro pagtutok kana it baril ag pagbueo sa anang gadget ag kwarta.
Matapos ro insidente suno kana hay gilayon nga nagpaeagyo ro mga suspek sa bahin it Jaime Cardinal Sin Avenue kon siin dikara eon man imaw nakapangayo it bulig hasta nga narespondehan imaw it pulis.
Apang, uwa eon nanda naabutan ro mga suspek nga madasig nga nakapaeagyo.
Sa makaron ro insidente hay padayon pa nga gina-imbestigahan it theft and robbery section it Kalibo PNP para sa nagakaigong disposisyon.
