KALIBO, Aklan — Magapangatubang sa reklamong pag-eabag sa Republic Act 9165 (Comprehensive Dangerous Drugs Act of 2002) ro daywang ka beautician nga bading matapos nga maaresto sa ginpatigayon nga drug buy-bust operation it Philippine Drug Enforcement Unit (PDEU), Philippine Drug Enforcement Agency (PDEA), Kalibo Municipal Police Station, Highway Patrol Group (HPG) ag Aklan Provincial Intelligence Branch sa may F. Quimpo Street, Poblacion, Kalibo.
Nakilaea ro mga suspek nga sanday Jonathan Namayan, alyas Jona, residente it nasambit nga lugar ag Errol Eugenio, tubong San Rafael, Camarines Sur, Bicol apang temporaryong naga istar sa Capitol Site, Brgy. Estancia, Kalibo.
Narekober sa daywa ro daywang ka sachet it suspected shabu kabaylo it P3,000 nga marked money.
Sa pagpangusisa it mga otoridad sa mga suspek, gin-ako it mga raya nga naga-gamit sanda it illegal nga droga apang ginpamalibaran ro pagduso.
Sa makaron ro daywa hay una eon sa paghinakop it Kalibo PNP para sa nagakaigong disposisyon.//
