KALIBO, Aklan—Ginpaathag ni Aklan 1st District Board member Nemesio Neron nga kinahang-ean ipabilin it mga kapulisan ro maximum tolerance sa tanan nga oras ag sitwasyon.
Raya ro naging pahayag it opisyal matapos ro natabo nga pagbaril-patay it suspek nga si Police Senior Master Sgt. Jonel Nuezca sa mag-inang Sonya ag Frank Anthony Gregorio it Paniqui, Tarlac ko adlaw it Dominggo.
Ginasugid nga ginsita it pulis ro mga biktima kaangot sa pagpaeupok it boga kung siin nagdiskusyon pa ro mga raya hasta sa nag-abot sa punto nga mabiral sanda it suspek.
Nasayuran nga dati eon nga nakaangkon it bagina ro magtimbang nga parte bangud sa isyu it right of way apang naayos eon sigon raya sa barangay.
Si Nuezca hay naka-destino sa Parañaque City Crime laboratory unit ag naga-istar sa Barangay Cabayaoasan, Paniqui, Tarlac.
Una kara, nagaguwa nga may una eon man nga ginapangatubang nga kasong grave misconduct ag daywang homicide cases ro suspek.
Base sa record, nasuspende eon si Nuezca ko February 2010 apang owa ginmitlang kung ano ro naging rason.
Dag-on 2013, ginpasakaan raya it administrative case ag nasuspende it sang buean ko 2015 bangud sa pagpakamatig-a kara nga indi magpaidaeom sa drug test ag gin-aywan ro testing area nga owa it permission ukon clearance halin sa National Police Commission (NAPOLCOM).
Dag-on 2016, ginkasuhan man raya it “serious neglect of duty” bangud sa kapas-eawan nga magtambong sa court hearing bilang prosecution witness it sangka drug case.
Sa makaron hay sa paghinakop eon it pulisya si Nuezca ag nagapangatubang sa kasong 2 counts of murder.
