Balitang Espesyal————-Gin-aresto it Hong Kong police ro daywang eaeaki sa kasong loitering matapos madakpan sa CCTV sa magkaseparado nga okasyon nga ginahugum nanda ro high heels ag rubber shoes it kaeapitbaeay nanda nga babaye sa 21st floor it Prosperland House ag Affluence Garden sa Tuen Mun, New Territories.
Suno kay Inspector Leung Kwun-ho it Tuen Mun criminal investigation unit, ro daywang suspect nga may edad nga 30 ag 31 hay bukon it magkakilaea ag owa it ebidensiya nga kilaea nanda ro biktima.
Ro biktima hay 27-anyos nga daeaga nga naga-istar kaibahan ro anang manghud nga babaye ag ro andang ina.
Nasayuran it biktima ro krimen matapos imaw nga hambaean it anang kaeapitbaeay nga nakita kara sa anang CCTV nga may eaeaking nagatindog sa prente it andang pwertahan ag ginahugum ro sapatos nga naaywan nana sa guwa.
Bangud kara, nagpakabit it kaugalingon nga CCTV ro biktima ag nakibot imaw nga daywang magkaibang eaeaki ro nagahugum it anang mga sapatos nga gina-aywan sa guwa it pwertahan.
Matapos ipakita it biktima ro CCTV footage sa pulisya, madasig nga nag-responde ro crime squad officers ag nadakpan ro daywang eaeaki.
Mag-eowas sa pag-aresto, ginkumpiska ro mga eambong nga suksok nanda sa CCTV footage bilang ebidensiya.
Nasayuran nga ro sambilog sa mga eaeaki hay nagatrabaho sa sangka pharmacy ag ro ikaywa man hay unemployed.
Suno sa imbestigasyon, ro sambilog kanda hay nag aku nga may fetish sa paghugum it sapatos it babaye.
Sa makaron, ro daywang suspect hay naka-detain sa police station ag padayun nga gina-kuwestiyon it mga awtoridad ag kun mapamatud-an nga guilty, posibleng makulong sanda it daywang dag-on.
