KALIBO, Aklan—Daywa eon nga ka funeral homes ro nagpahayag it interes nga makipag-partner sa lokal nga gobyerno it Kalibo sa pagpatindog it crematorium para sa mga namatay nga COVID-victim.
Suno kay Kalibo Mayor Emerson Lachica nga ro nasambit nga plano hay igapaagi sa Public Private Partnership ukon PPP.
Mag-eowas sa san fernando funeral homes nga naga-offer nga sanda ro magasabat sa contruction it crematorium ag ro LGU ro maga-usoy it eugta, sambilog pa ro nagtanyag nga magsueod sa joint venture.
Gusto sigon it nasambit nga investor nga sanda eon ro maga-provide it eugta ag magpatindog it crematorium.
Matapos ro pag-apruba it sanggunang bayan it kalibo, naga-usoy eon sigon sanda it eugta ag sambilog sa andang ginapuntirya hay sangka lote sa Barangay Nalook.
Engkaso nga madayun, magapatigayon anay it public hearing agud nga mabo-oe ro pulso it mga residente.
Ro pagpatindog it crematorium hay ginproponer matapos nga nagpamalibad eon nga magbaton ro naga-isaeahanon nga crematory sa bilog nga isla it panay sa siyudad it Iloilo bangud sa kaabuon it mga ginadaea idtu nga bangkay.
Mag-eowas kara, gin abisuhan eon ro mga aklan mayors nga magpahaum it COVID burial grounds.
Gindugang pa ni Mayor Lachica nga ro ginaproponer nga pagpatindog it kaugalingon nga crematorium hay agud nga indi eon masyadong magastusan ag malisdan ro mga himata it mga mamatay bangud sa COVID-19.
Ginapadasig eon sigon nanda ro pag-review it mga proposal agud nga maumpisahan eon ro operasyon sa mas madali nga tiempo.
Sa makaron hay padayun pa nga naga-usoy it eugta nga may eapad nga mga 1,000 square meters nga pagabutangan it crematorium agud nga maumpisahan ro construction.
Base sa guidelines it Department of Interior and Local Government ukon DILG ag Epidemiologist and Infectious Disease Specialist, ro cadavers it mga pasyente nga namatay sa deadly virus hay dapat nga ma-cremate ukon maeubong sa sueod it 12 oras.
