KALIBO, AKLAN — Ginsunog it uwa pa nakilaeang mga suspek ro daywang heavy equipments it sangka construction company sa kilid it national highway it Brgy. Daguitan, Banga, Aklan.
Suno kay FO3 Joseph Dapitillo it Bureau of Fire Protection (BFP)-Kalibo, pasado ala-1:00 it kaaganhon kat matabo ro pagsunog sa mga heavy equipments it BSP Company, Inc. sa nasambitang lugar.
Kaeakip sa mga ginsunog it mga suspek ro sangka grader truck ag pison nga ginsabotahe it mga nag-atakeng kaeaeakinhan nga nakasakay sigon sa daywang motorsiklo.
Ginapabutyag nga ginbuhusan it pintura ro mga heavy equipment antes ginsilaban gamit ro sangka sueo.
Ro nasambitang mga heavy equipments hay ginagamit sa nagapadayon nga road widening project sa Banga-Libacao road.
Ro mga suspek hay madasig nga nakapaeagyo matapos sunugon ro nasambitang mga heavy equipments.
Pagbaeos ukon personal grudge ro ginatan-aw nga kabangdan it mga otoridad matapos nga may pilang mga trabahador ro napahalin, apang padayon pang gina-imbestigahan it Banga Municipal Police station ag BFP ro insidente.
Samtang, bukon it kumbinsido ro mga otoridad nga may kaangtanan ro rebeldeng New People’s Army (NPA) sa insidente bangud mabuhay eon nga gindeklarang insurgency-free ro Aklan.
