KALIBO,Aklan–Gin-report it Provincial Disaster Risk Reduction and Management Office ukon PDRRMO nga nakalista it daywang insidente it pagka-eumos sa nagkaeain-eain nga lugar sa probinsiya it Aklan kadungan sa selebrasyon it kapistahan ni San Juan de Bautista.
Suno kay Jeffrey Jizmundo it PDRRMO-Aklan nga ro mga insidente hay nailista sa mga baybayon it Brgy. Ochando , New washington ag Brgy. Dapdap, Tangalan kahapon it agahon.
Sa owa it swerte hay binawian it anang hueam nga kinabuhi ro sangka 57 anyos nga ginang nga nagpaligos sa baybay it Brgy. Ochando.
Gintinguhaan pa raya nga madaea sa Aklan Provincial Hospital , apang gindeklarang dead on arrival it nagtatap nga doktor.
Samtang , natigayon nga maeowas it mga responders ro sangka eaeaki nga samtang nagapaligos hay inatake it anang sakit nga kueo.
Matapos nga mataw-an it first aid hay gindaea raya sa ospital para sa dugang nga medikasyon.
Ginpahayag ni Jizmundo nga nagdagsa ro mga beachgoers bangud nga natiempo nga weekend ro kapistahan ag mabuhay nga nagpabilin sa mga baeay ro mga pumueuyu bangud sa covid 19
Naobserbahan man sigon nanda nga punuan ro mga resort ag mga beach rason nga naka alerto ro andang pwersa hasta hin aga nga adlaw it Dominggo.
Samtang, uman nga ginpadumdum it PDRRMO ro mga pumueuyu nga magdahan ag maging responsable sa pagpilak it andang mga basura.
Kaeabanan sigon nga nagakatabu ro pagkaeumos bangud sa kawad-an it bantay it mga unga samtang nga nagapaligos kamana man ro sobrang kahilungon .