Nadiskubrihan it Department of Agriculture (DA) nga sarado eon o bukon eon it operational ro daywang kumpanya nga nagapanag iya it pilang ka kargamento it bugas nga nakatambak makaron sa Pier. Raya ro kinumpirma ni Agriculture Secretary Francisco Tiu-Laurel.
Ginhambae ni Laurel nga nagakonsulta eon sanda sa anda nga legal unit, raya hay para masayran kung dapat makasuhan o mapanabat ro mga dating kumpanya o consignee it pilang kargamento it bugas nga nakatambak sa port of Manila.
Suno kay Laurel, nadiskubre nanda nga bukon eon it existing o owa it kinamatarung nga maka boeo ro daywang kumpanya nga nakapangaean sa pilang kargamento.
Rason nga deklarado eon sigon nga abandonado ro mga nasambit nga kargamento. Sugid pa ni Laurel nga sa masunod nga daywang dominggo hay masayran eon nanda ro nila kabilugan nga detalye it mga ginbandonang kargamento.
Pagasayuron man kung may masayran pa nga mga indibidwal o kumpanyang nagapanag iya, ginbutang kara nga dapat eang nga may pagasabton o makasuhan sa mga raya bangod sa mabuhay eon nga nakatambak ro kargamento sa pier ag posibleng may paghana nga i hoard raya agod nga kumita eon it mas mabahoe o ro ginatawag nga profiteering.
Ginpausisa eon sigon nanda sa bureau of plant industry kung eowas pang kan-on ro mga bugas nga sueod container vans. Kung maguwa sigon sa pag-usisa nga eowas nga kaunon, naka depende eon sigon sa magiging deklarasyon it bureau of customs kung ro mga abandonadong kargamento it bugas hay igapangidaeom sa auction o kung pwedeng ibaligya eon eamang raya sa mas barato nga kantidad it mga kadiwa outlets.
Ginhambae ni Laurel nga sa makaron hay bukon pa it makato kaabo ro mga container van nga padayon nga naka tambak sa pier ag ro mga rsys digon hay sueod pa man sa 30 diyas nga tyempo umpisa kat ginsugtan raya sa pyer. Nakaistorya eon man sigon nanda ro mga consignee ag importers ag amat-amatan eon nanda nga ginapaguwa ro mga kargamento.
