Kalibo Aklan ———–Paealigban makarun para sa mga residente ro natabong pageapa-eapa it ginapatihang aswang sa daywang ka mga alagang baboy sa Carabao Island sa Hambil, Romblon.
Nagapati ro tag-iya it baboy nga si Phillip Gabinete Navotas nga bukon it tawo kungdi sangka tinuga nga may maeain it ginhawa ro nagpatay sa anang mga alagang baboy.
Mingko milagro man sigon kung ham-an nga owa it may nabilin nga dugo ag kasudlan sa mga ginpatay nga baboy.
Dugang pa kara nga kung tawo eamang ro nagpatay sa mga nasambitan nga sapat hay may nagtamsik gid nga dugo ukon may inagyan it ano man nga klase it mataeom nga bagay.
Apang ro natabo sigon hay medyo ginsupsop eamang ro dugo it mga baboy ag gineapa-eapa hasta nga natigayon nga makaon ro mga kasudlan ag unod.
Ro nabilin eun lang sigon sa anang mga baboy hay ro daywang ka mga ueo ag siki ag pilang parte it kaeawasan.
Samtang ginpahayag man ni Mr. Gilbert Malacad, sangka principal sa nasambitan nga lugar ag sambilog sa mga nakasaksi sa hitabo nga raya ro unang beses nga may kaparehong natabo sa andang lugar.
Dugang pa kara nga ginarespeto ag maboot ro pamilya it tag-iya it baboy rason nga imposible man nga ginmalitan eamang ro andang mga alagang sapat.
Sa makarun hay ginpakamayad eun lang nandang ireport sa mga katapo it kapulisan ro nasambitan nga hitabo.
