Kalibo Aklan——–Nakataeanang magapangatubang sa kasong pag-eabag sa Presidential Decree 705 ukon Illegal Logging ag sa Republic Act 9175 ukon Unregistered Chainsaw ro daywa ka mga kaeaeakin-an matapos nga maaprehend it pulisya bandang alas-3:30 it hapon sa Brgy. Toledo, Nabas.
Ginkilaea ni PMSgt. Joan Roa it Nabas PNP ro daywa nga sanday Jose Rizanie Española, 52-anyos it Brgy. Malogo ag si Junie Pines, 41-anyos it Brgy. Mabusao sa banwa it Ibajay.
Nakumpiska sa mga raya ro kapin sa 13 ka mga linagare nga kahoy nga may nagkaeain-eain nga sukat ukon nagaabot tanan sa 80.3 board feet nga may estimated value nga P2,810 pesos.
Una kara, may nagreport sa taeatapan it pulisya nga may nagaeagari it kahoy sa nasambit nga lugar kon sa siin sa pag-usisa it mga otoridad hay uwa it maipakita nga dokumento partikular it permit to cut ro daywa rason nga gin-aprehend ro mga raya ag gindaea sa Nabas Police Station kon sa siin sanda temporaryong ginkustudiya para sa nagakaigong disposisyon.
Samtang, ro nasambit nga mga kahoy hay ginturn-over eon sa Department of Environment and Natural Resources (DENR-Aklan) partikular kay forest ranger Junrey Yeban.
