KALIBO, Aklan — Daywang unga ro padayun nga gina-obserbahan sa magkaseparado nga ospital matapos nga madale it dikya ukon jellyfish samtang nga nagapaligos sa baybayon nga sakop it Brgy. Sungculan, Batan, Aklan.
Base sa report, inatake it jellyfish ro mga biktimang sanday Edmund Benedicto Jr., 12-anyos nga ginsaylo sa sangka pribadong ospital samtang ro amigo kara nga si Edwin dela cruz, 11-anyos hay nagapabilin sa Aklan Provincial Hospital, parehong residente it nasambit nga lugar.
Samtang, ginpahayag it Bureau of Fisheries and Aquatic Resources (BFAR) nga kaabuan sa mga dikya hay nagapaguwa it makamaeatay nga toxins rason nga peligroso sa mga maduktan kara.
Ginlaygay man it mga eksperto nga indi magpanic engkaso nga atakehon it dikya.
Indi sigon paghugasan it fresh water ro lugar nga ginduktan it jellyfish sa baylu hay pahiran raya it baeas .
Pwede man nga magbutang it simuyaw, harina ukon eanggaw antes nga daehon sa pinakamaeapit nga ospital .
