KALIBO, Aklan—Ginpabayad eon it lokal nga gobyerno it Malay it tig-P5,000 pesos nga multa ro tag-ana it baeay ag party organizer matapos ro ginhimo nga pag-eabag sa COVID-19 health protocols sa ginpatigayon nga Halloween party ko Oktubre 31 sa Brgy. Manocmanoc sa isla it Boracay.
Ginkumpirma ni Malay Mayor Frolibar Bautista nga ro Jade’s Casa de Arte nga ginhiwatan it event hay owa it nagakaigo nga business permit ag iba pang dokumento sa andang operasyon.
Padayun pa sigon nga ginatumod ag gina-usoy ro sambilog pang organizer nga imaw ro may buyot it logbook it mga tawong nagtambong sa party.
Medyu maeayo suno kana ro nasambit nga baeay sa main road , mga 700 metros ro eayo ag may swimming pool.
Ginasugid nga gin-rentahan raya para sa sangka birthday party.
Nauna eon nga ginbatikos it Department of Tourism ro LGU-Malay bangud sa ginasugid nga pagpabaya kara matapos nga magtuhaw ro sangka video, kun sa siin hay makitang owa nakasuksok it face masks ro mga partygoers ag owa nagasunod sa physical distancing.
