KALIBO, Aklan — Naninahan ro daywang katawo sa natabu nga pagbungguabn it motorsiklo ag tricycle pasado alas-9:00 ko Martes it gabi-i sa national highway nga sakop it Brgy. Bulwang, Numancia.
Nakilaea ro mga biktima nga sanday Frenz Joshua Fuentes, 23, driver it motorsiklo ag residente it Brgy. Laguinbanwa East, Numancia ag ro anang angkas nga si Jonathan Trinidad, 22, it Brgy. Mambog, Banga.
Base sa report, magapa-agto kunta sa Brgy. Mambog, Banga ro mga biktima, apang kat maka-abot sa pakurbada nga karsada sa nasambit nga lugar, ginasugid nga naghana nga mag-overtake ro motorsiklo sa sangka saeakyan ag naagaw ro linya it tricycle nga nagresulta sa andang banggaan.
Nag-angkon it kahalitan sa eawas ro driver it motorsiklo ag backrider kara rason nga insigidang gindaea it mga rumespondeng rescuer sa ospital.
Insigidang nagpaeagiw sa lugar ro driver it tricycle matapos ro aksidente.
Sa kustodiya makaron it Numancia Police Station ro daywang behikulo para sa nagakaigo nga disposisyon.
