KALIBO, Aklan—Naeowas ro daywa nga mangingisda matapos kumueob ro andang baroto kasunod it pagbaskog it hangin ag uean pasado alas-2:00 it hapon it domingo sa baybayon nga sakop it Brgy. New Buswang, Kalibo.
Suno kay Jessery Jimenez, miyembro it bantay dagat ag sambilog sa mga nag-rescue sa mga mangingisda nga insigida nanda nga gintabangan ro mga biktima matapos nga magpangayo it bulig ro mga residenteng nakakita sa kumueob nga baroto.
Apang pag abot nanda sa lugar hay gina-guyod eon it pilang mga kaparehong mangingisda ro kumueob nanda nga barko.
Sa pihak nga parte, ginsaysay ni Sonny Boy Pilar, sambilog sa mga nakaeowas nga mangingisda nga nagapa-uli eon kunta sanda makataliwan ro daywang adlaw nga pagpangisda sa eawod, apang gulpi nga nagka-aberya ro makina it andang baroto.
Bangud nga indi eon mag-andar ro andang baroto, nagpaeutaw-eutaw sanda sa eawod hasta nga hinampak it mabaskog nga baeod nga gintunaan it pagkueob it baroto.
Haeos zero visibility sigon ukon owa sanda it masyadong makita nga mga isla kahapon bangud sa mabaskog nga uean.
Nabalewala man suno kana ro andang pagpanagat bangud ro andang dakop nga isda hay nauea sa tubi.
Apang sa pihak kara, mabahoe ro andang pagpasaeamat bangud nga owa man it nailistang naninahan sa insidente.
