KALIBO, Aklan — Namatay samtang ginabueong sa ospital ro sangka rider samtang sambilog pa ro naninahan matapos nga magbueungguan ro andang mga motorsiklo sa karsadahon nga sakop it Brgy. Mabilo, Kalibo, Lunes it gabi-i.
Patay sa sangka pribadong ospital ro biktimang si Richard Coronado, 36, residente it Sitio Saugan, Brgy. Tambak, New Washington bangud sa naangkon nga nina sa eawas ag ueo matapos nga bumaliktad ro anang motorsiklo.
Samtang, matapos nga mabueong sa provincial hospital ro naagum nga mga nina sa eawas, gindaea ag ginkulong sa Kalibo Police Station ro nakabungguan nana nga rider nga si Tomas Tibulan, 33, tumandok it Brgy. Aglucay, Makato, apang presenteng naga-istar sa Ureta Road, Brgy. Andagao, Kalibo.
Sa imbestigasyon it kapulisan, sakay it Honda TMX si Coronado pauli sa Brgy. Tambak, New Washington samtang ro direksyon man ni Tibulan sakay it anang Motorstar hay paagto sa Kalibo nga naging rason it head-on collision it daywang motorsiklo.
Ginasugid nga si Tibulan hay una sa impluwensiya it makahieilong nga ilimnon ag owa it drivers license.
Insigidang gindaea ro daywa sa provincial hospital, apang ginsaylo si Coronado sa private hospital bangud sa kritikal nga kondisyon, nga kon sa siin, ko ulihi binawian it hueam nga kabuhi.
