KALIBO, Aklan—Magapangatubang it kasong frustrated homicide ro sangka eaeaki matapos nga magpang-eabo sa sangka birthday party sa Brgy. Tina, Makato.
Nakilaea ro daywang biktima nga sanday Marlon Paderan it Brgy. Dumga, Makato ag Erwin Pastrana, residente it nasambitang lugar samtang ro suspek hay nakilaea nga si Wayne Jay Ibabao.
Suno kay PSSgt. James Padasas, imbestigador it Makato PNP, magkaibahan nga nag-inuman sa birthday party ro magtimbang nga parte kung sa siin nakaangkon it mainitan nga argumento sa tunga it suspek ag certain “Jeric”.
Kasunod kara hay pareho sigon nga nag-uli ro daywa apang makataliwan ro pilang minuto hay bumalik si Ibabao nga may daeang sanduko ag owa it karason–rason nga gin-eabo mga biktima.
Bangud kara, nag-angkon it mga tama sa waea nga abaga ag siko si Paderan samtang si Pastrana hay nag-agum it lastro sa anang waea nga tuhod.
Ro mga biktima hay insigida man nga gindaea it MDRRMO-Makato sa Aklan Provincial Hospital para sa nagakaigo nga pagbueong.
Ginpahayag dugang nga nagpatigayun it hot pursuit operation ro mga kapulisan kung siin madinaeag-on nga naaresto ro suspek sa andang panimaeay.
Sa makaron hay sa kustodiya eon it Makato Police Station si Ibabao para sa nagakaigo nga disposisyon.
