REGIONAL News — Daywa ro patay samtang 11 nga iba pa ro naninahan matapos araduhon it sangka pribadong saeakyan ro sangka prusisyon para sa Semana Santa sa kahabaon it Granada-Alangilan Road sa Purok 20, Barangay Alangilan, Bacolod City bandang alas-7:20 it gabi-i it Biyernes Santo.
Suno sa Traffic Enforcement Unit it Bacolod City Police Office, sangka pueang Toyota Innova ro nag-agi halin sa Barangay Alangilan paagto sa Barangay Granada kat bungguan kara ro sangka tricycle nga gulping eumusot ag umabante sa patrol car nga nagapanguna sa prusisyon.
Bangud sa kabaskog it pagbunggo, inapok ro tricycle ag bumagsak sa patrol car it pulis antes nga tumama sa sangka multicab.
Insigidang binawian it kabuhi ro driver it tricycle nga nakilaea kay Jonelo Solan Sr., 66, ag residente it Purok 6, Barangay Alangilan.
Limang pasahero it tricycle ro naninahan, kun sa siin sambilog sa mga raya ro namatay ko ulihi samtang ginabueong sa ospital.
Naninahan man ro limang menor de edad nga nagpasakop sa prusisyon, puro mga residente it Barangay Alangilan.
Ro driver it patrol car nga si PMsg Domingo Villar ag ro anang kaibahan nga si PMsg Freddie Jimenez hay nag-angkon eamang it slight injury.
Ro mga sakay it Toyota Innova hay unang nag-eskapo nga ko ulihi hay nadakpan man it mga rumespondeng pulis maeapit sa lugar it insidente.
Ro saeakyan hay gina-maneho ni Jagpret Shingh, sangka 37-anyos nga Indian national nga residente it Buena Park Subdivision, Barangay Villamonte, Bacolod City.
Kaibahan nana ro mga kaparehong Indian national nga sanday Hajrgit Singh, Tarenjeet Singh, Satver Singh, ag Balwinder Singh Gill, puro mga residente man it nasambit nga subdivision.
Guba ro prente it Innova ag nag-deploy ro mga airbags kara.
Matapos ro andang pagka-aresto, gindaea sa ospital si Jagpret Shingh ag sambilog sa anang kaibahan para boengon ro mga naangkon nga nina samtang ro nabilin nga tatlo hay sa kustodiya it Police Station 5.
