KALIBO, AKLAN — Daywang ka mga unga ro namatay sa Malay, Aklan bangud sa dengue, apang, manaba ro mga kaso it sakit kumpara ku nagtaliwan nga dag-un.
Suno sa pinakaulihing record it Provincial Health Office (PHO)-Aklan, may una eon nga 269 nga kaso it dengue sa probinsiya umpisa ku Enero 1 hasta Mayo 16, mas manaaba it 24 porsyento kumpara ku nagtaliwan nga dag-un sa magkaparehong period nga may 356 nga kaso.
Tanan nga 17 nga banwa sa Aklan hay may nailistang kaso kun siin pinakamataas kara ro Kalibo nga may 56; sinundan it Numancia nga may 33 ag Malinao nga may 24.
Ro banwa it Malay hay nakalista it 20 dengue cases ag daywa dikara ro patay nga puros mga unga nga may edad nga tatlo ag lima.
Kaabua sa mga nagkasakit it dengue hay mga unga nga may edad nga 1 hasta 10 dag-un.
Uman nga gin kumbinyu it PHO ro publiko nga maglimpiyo sa palibot ag sundon ro 4S strategy it Department of Health.
