Kalibo Aklan——-Sangka vehicular accident ro nag-eontad sa national highway nga sakop it Brgy. Tigayon, Kalibo.
Raya hay ginaimbolbaran it tatlong ka motorsiklo kon sa siin ro sambilog hay ginamaneho it sangka pulis nga ginkilaeang si Patrolman Romeo Arnolfo, tubong Zambaonga Del Sur.
Base sa report, samtang una sa slow moving portion it karsada hay aksidenteng nagsunggaban sanda it nagaabot nga motorsiklo nga ginamaneho ni Jhon Leo Luciano, sa legal nga edad ag residente it Brgy. Cabugao, Altavas.
Bangud sa mabaskog nga impact, inapok sa pihak nga linya it karsada rason nga nasunggaban it motorsiklo nga ginamaneho ni Aerold Barrios, sa legal nga edad ag residente it Bayanihan Road, Brgy. Pook, Kalibo.
May kaangtanan kara, si Luciano ag si Barrios hay nakaangkon it kasakitan ag lastro sa kaeawasan nga insigida man nga gindaea sa sangka pribadong ospital iya sa banwa it Kalibo kon sa siin sanda sa makaron naka-confine para sa anang nagakaigong pagbueong.
