Nabiktima it salisi gang ro sangka 62-anyos nga vendor sa banwa it Ibajay kahapon, adlaw it Huwebes, Setyembre 10.
Suno kay PMaj. Rajiv Salbino, hepe it Ibajay Municipal Police Station, ginreport sa andang taeatapan ro nasambit nga insidente bandang alas-8:30 it agahon.
Ginasugid nga may limang katawo ro nag-bakae sa nasambit nga vendor kun sa siin ro iba kanda hay ginabuoe ro anang atensyon samtang ro iba hay ginbuoe eon ro anang bag nga may sueod nga P5000, listahan it mga pautang ag iba pang personal nga kagamitan.
Base sa imbestigasyon, ro mga suspek hay nag-panaog sa sangka saeakyan nga ginparking sa kaeayuon nga 100 meters halin sa tindahan. Pagkatapos sigon it pagpang-salisi, nag commute ro mga raya paadto sa nasambit nga saeakyan ag uman nga sumakay.
Bangud kara, gin-alarma nanda ro iba pang police stations, eakip eon ro Banga MPS kun sa siin na hold ro daywa ka mga eaeaki nga suspek. Insigida man nga gindaea ro biktima sa lugar kun sa siin eagi nana nga ginkumpirma ro mga suspek.
Sa pag-usisa sa saeakyan, nakita idto ro baligya it biktima, susi it anang baeay, kwarta, pati eon man ro eambong nga gingamit it mga suspek kat patigayunon ro insidente.
Paathag ni PMaj. Salbino, mabahoe ro posibilidad nga konektado ro mga raya sa na report man nga pagpang-budol sa Brgy. Rigador kun sa siin nabue-an ro sangka senior citizen it P15,000 ag €140 euro.
Sa makaron, padayon pa nga ginaimbestigahan ro nasambit nga mga insidente.
