KALIBO, Aklan—Magapangatubang sa nagakaigong kaso ro daywang ka mga trabahador it sangka supermarket matapos nga magpaeosot it grocery paguwa it establisyimento.
Nakataeana nga pasakaan it kasong Qualified Theft ro daywa nga ginkilaeang sanday Re Jean Ruiz, 24-anyos it Brgy. Estancia ag Naneth Flores, 39-anyos it Brgy. Tigayon, Kalibo.
Base sa report, ro daywa hay nadakpan nga nagpaeosot it item kon sa siin nag-agi sigon mismo raya sa counter it kahera nga si Ruiz nga nagabalor it masobra sa P4,000 pesos nga ginakaeakipan it mga essential goods.
Ro nasambit nga mga produkto hay ginbueo it anang kakuntsaba nga si Flores nga ko ulihi hay nataeopangdan it tag-iya nga uwa nagakasinanto ro record it ginbayaran sa nasambit nga mga items.
Dikara eon nag-imbestiga ro tag-iya ag ko ulihi nasayuran nga 270 pesos eamang ro ginbayaran kara imbes nga 4,328 pesos.
Bangud kara, insigidang nagkasa it operasyon ro pulisya nga nagresulta sa pagkaaresto it daywa.
Mag-eowas kara, narekober man ro mga goods nga andang tinakaw.
