KALIBO, Aklan — Nadakpan it mga otoridad ro daywang wanted person sa magkaseparadong lugar sa banwa it Banga, Lunes it agahon.
Unang naaresto ro wanted nga si Kenny Natabio, 30, residente it Brgy. Pagsanjan nga may warrant of arrest bangud sa kasong homicide.
Nasayuran nga si Kenny ro suspek sa pagpatay sa anang kaugalingon nga igmanghud nga si Lina Natabio ko Mayo 4, 2019 nga nasapwan nga nagaka-agnas eon nga bangkay nga may lastro sa ueo.
Kapin sa P120,000 ro gintaeana nga piyansa it korte para sa anang temporaryong kahilwayan.
Samtang, arestado man ro sangka rapist nga wanted sa Brgy. Badiangan sa nasambit man nga banwa.
Nakilaea ro suspek nga si Jimmy Rano, 72, nga nauna eon nga ginreklamo it pagpanghimueos sa sangka menor de edad.
Owa it piyansa nga gintaeana ro korte para sa anang temporaryong kahilwayan.
Ro warrant of arrest it daywa hay parehong ginpaguwa ni Judge Bienvenido P. Barrios Jr., presiding judge it RTC 6 Branch 3, Kalibo, Aklan.
Ro daywa hay nakataeanang igaturn-over sa korte nga natungdan.
