KALIBO, Aklan—Pag-eabag sa Anti-Carnapping Law ro reklamong posibleng paga atubangon it 20 anyos nga suspek sa pagpanakaw it sangka jeep bandang alas-4:10 kaina it aga-aga sa Brgy. Laguinbanua West, Numancia.
Suno kay P/MSgt. Felizardo Navarra, imbestigador it Numancia Municipal Police Station nga sangka Marlon Braza Jr., residente it nasambit nga lugar ro nag-report sa andang estasyon matapos nga madiskubreng naduea ro jeep it anang amo nga si Gregorio Cabrera Garcia Jr., 60, residente man sa lugar nga nakaparada sa kilid it national highway sa guwa it andang baeay.
Sa nabo-oe nga CCTV footage sa lugar, kita ro suspek nga ginbo-oe ro saeakyan ag ginmaneho paagto sa direksyon it banwa it Makato.
Sa ginpatigayon nga hot pursuit operation, nasundan ro suspek nga ginamaneho ro saeakyan hasta nga pag abot sa Brgy. Tina, Makato hay naaksidente raya ag bumunggo sa poste it telcos, kun sa siin dikara nasayuran ro pagkatawo it suspek nga nakilaea kay Remer Vales Gabat, ag residente it Brgy. San Vicente, Santa Cruz, Occidental Mindoro.
Ginasugid nga nag agto raya sa Aklan agud nga mag usoy it trabaho.
Apang nabudlayan nga maka usoy it trabaho ag maistaran rason nga gusto kunta nana nga magbalik sa Mindoro gamit ro gin carnap nga saeakyan.
Si Gabat hay presenteng sa kustodiya it lock-up cell it Makato PNP.
