KALIBO, Aklan—Nagapangatubang sa kasong pag-eabag sa RA 9165 ukon Comprehensive Dangerous Drugs Act of 2002 ro sangka 20 anyos nga eaeaki matapos nga maaresto sa ginpatigayon nga buybust operation bandang ala-1:50 kaina it aga-aga sa Brgy. Manocmanoc, Boracay.
Nakilaea ro suspek nga si Cedrick Villanueva it Tablas, Romblon ag temporaryong naga-istar sa nasambit nga barangay.
Insigidang gin-aresto ro suspek matapos nga mabak-ean it sangka plastic sachet nga may sueod nga kulay brown nga solid substance nga ginapatihan nga marijuana ukon hash.
Sa pagkapkap sa suspek, narekober sa anang posesyon ag kontrol ro 600 pesos nga buybust money ag dugang nga daywang sachet it iligal nga droga.
Ro operasyon hay ginpatigayon it Drug Enforcement Team it Malay Municipal Police Station.
