KALIBO, Aklan—Sangka 20 anyos nga eaeaki ro mas ginpili nga maging single parent kaysa nga makipag-ayos sa anang 23 anyos nga dating live-in partner nga nagloko kana.
Sa interview it Bombo Radyo Kalibo, ginsaysay ni alyas Jonas ro masakit nga experiensiya matapos nga madakpan sa akto ro anang partner nga kaibahan ro anang kalaguyo sa sueod it kwarto sa baeay it anang magueang sa sangka lugar sa banwa it Kalibo.
Sa andang pagbueag hay naaywan sa anang poder ro pag-alaga sa andang eapsag nga naga-edad ko rato nga tiempo it daywang buean pa eamang.
Gin-aku sigon nana ro pag alaga bangud nga owa it ikasarang ro ina nga buhi-on ro andang unga.
Masobra sa sang dag-on ag tunga man sigon sanda nga nag-iba nga ko rato nga tiempo hay naga-edad pa eamang imaw it 19 ag ro babaye hay 21.
Nagkilaea sigon sanda pinaagi sa common friends hasta nga naging magka-barkada nga ko ulihi hay nahueog sa pagiging mag-lovers.
Unwanted sigon ro andang love child bangud nga bukon itplanado ro pagnabdos it dating karelasyon nga tumandok it antique.
Owa sigon sanda nga nagdesisyon nga magpakasae bangud nga mag-eowas nga parehong bata hay naga-eskwela pa imaw.
Sa pihak nga parte, gindugang pa ni Jonas nga malabo eon nga magkabalikan sanda it ina it anang unga bangud nga may kanya-kanya eon sanda nga kabuhi sa euyo it andang presenteng karelasyon makaron.
Masadya man sigon imaw sa anang unga nga naga-edad eon makaron it sang dag-on kun sa siin carbon copy nana ro anang baby.
Naging mabakod sigon imaw sa mga pagsubok bangud sa suporta kana it anang ina.
