KALIBO, Aklan—Haeos 200 nga pamilya ro apektado it ginpatuman nga Surgical Enchanced Community Quarantine sa Purok 1, C. Laserna St. Brgy. Poblacion, Kalibo umpisa makaron nga adlaw, Nobyermbre 20.
Suno kay Punong Barangay Niel Candelario, makabig nga critical area ro lugar matapos nga siyam ro nailistang nagpositibo sa Coronaviru Disease 2019 ukon COVID-19.
Ro mga nasambit nga indibidwal suno kana hay nakaangkon it exposure sa nauna eon nga nagpositibong pasyente nga residente man it lugar apang namatay samtang ginadaea sa Aklan Provincial Hospital.
Suno kana, insigida sandang nagpatigayun it emergency meeting kaibahan ro kapulisan ag Municipal Health office (MHO)-Kalibo ko adlaw it Huwebes agud nga maistoryahan ro mga tikang nga posible nandang himuon.
Nagaeaum man raya nga magnegatibo sa deadly virus ro mga nakasalamuha it nasambitang mga pasyente.
Ro lockdown hay magabuhay it hasta daywang Dominggo sandig sa ginpagguwa nga Executive Order ni Kalibo Mayor Emerson Lachica apang posible rayang i-lift it mas temprano depende sa resulta it ginpaidaeom nga swab test.
Ginpahayag dugang nga may ginpahaum eon sandang relief assistance para sa mga apektadong residente kamana man nga ginapangayo kara ro kooperasyon ag pag-intindi it mga pumueoyo nga sundon ro minimum health protocols agud nga indi eon magkalhit pa ro virus.
Sa makaron naga-abot eon sa 215 ro kabilugan nga kaso it COVID-19 sa Aklan kung siin 168 ro naka-recover samtang 38 pa ro nagapabilin nga active case ag 9 ro nailistang namatay.
