KALIBO, Aklan—Pormal eon nga nagtapos ro 2020 Tokyo Olympics nga ginakabig nga greatest show on earth!.
Ro closing ceremony hay ginhiwat sa National Stadium sa pagpanguna ni Japanese Crown Prince Fumihito nga manghod ni Emperor Naruhito.
Nasaksihan sa pagtapos it seremonya ro mga nabilin nga atleta halin sa masobra 200 ka mga nasyon nga nagpasakop sa olimpiyada eakip ro mga flag bearer it tagsa ka mga nasyon kun siin si Filipino boxing featherweight Olympic silver medalist Nesthy Petecio ro nagbitbit sa bandera it Pilipinas.
Nasayuran nga base sa protocol, ro mga atleta hay gin-abisuhan nga mag-uli sa andang nasyon sa sueod it daywang adlaw matapos ro andang pagpasakop sa kompetisyon.
Ro Tokyo 2020 Olympics hay may tema makaron nga “Worlds We Share”.
Owa man it ginapasugtan nga mga tumaean-aw bangud sa padayun nga pagpanaeasa it pandemya daea it COVID-19.
Nasaksihan man sa closing ceremony ro pagsaylo it summer Olympics halin sa Tokyo paadto it Paris, France nga pagahiwaton sa 2024.
