Kalibo Aklan ———Aprubado eon sa ikatlo ag ulihing pagbasa ro Appropriation Ordinance No. 2020-015 ukon 2021 Annual Budget it probinsya it Aklan.
Raya hay kasunod it ginpatigayun nga 72nd regular session it Sangguniang Panlalawigan it Aklan, kahapon, Disyembre 1.
Kadungan kara hay ginpatigayun man ro signing ceremony nga ginpangunahan ni Aklan Governor Florencio Miraflores, Vice Governor Renaldo “Boy” Quimpo, tanan nga mga board member ag head of offices.
Ro ginproponer nga alokasyong pondo para sa masunod nga dag-on hay nagakahaeaga it P2.004 billion kung sa siin mas manaba raya it kapin sa P220 million kumpara sa 2020 annual budge it probinsya.
Samtang, sa nasambitang numero ro nakabooe it pinakamataas nga alokasyon hay ro Social Services nga nagabalor it P971, 500. 582 million ukon 48 percent samtang ro General Public Services hay nakabooe it P537.883 million ukon 27 percent ag Economic Service nga may alokasyon nga P494, 906.964 million ukon 25 percent.
Ginatutukan makaron it probinsiya ro pagtao it basic services ag mapabilin ro mga proyekto ag programa para sa pag-angkon it bastanteng pagkaon, ikamayad nga eawas ag Covid-response sa mga ginakabig nga pinaka-vulnerable tuga it pagbagsak it ekonomiya daea it epekto it pandemya.
Pila sa mga proyekto nga pagataw-an it pondo it provincial government hay ro construction it evacuation centers, multi-purpose pavements ag Ligtas Covid Centers, ag provision it Personal Protective Equipments (PPEs) para sa frontliners.
