KALIBO, Aklan — Madinaeag-on nga napatigayon ro 2025 Western Visayas Regional Athletic Association (WVRAA) Meet sa probinsiya it Antique.
Sa interview it Bombo Radyo Kalibo kay Hernani Escullar Jr., tagapaghambae it Department of Education (DepEd)-Region 6, mabahoe ro andang pagpasaeamat bangud nga owa sanda it may nailistang ‘major incident’ umpisa sa unang adlaw it sporting event ko Marso 3 hasta nga raya hay natapos makaron nga adlaw it Biyernes, Marso 7.
Suno kay Escullar, indi malikawan nga may maninahan nga mga atleta samtang nagahampang apang insigida man sanda nga nataw-an it atensyong medikal.
Hugut man sigon nga ginsunod it mga tournament officials ro direktiba it PDRRMO Antique nga engkaso nga grabe ro kainit it tiempo hay ipaiway ro mga hampang umpisa alas-10 it agahon hasta alas 2 it hapon rason nga may pilang sport event nga nadelay.
Tuyo sigon kara nga maprotektahan ro ikamayad nga eawas it mga atleta samtang una sa andang poder.
Samtang, gindeklarang kampeon ro Iloilo sa Regular Sports Secondary ag sa Para Games ag ro Negros Occidental ro kampeon sa Elementary sa 2025 WVRAA Meet.
Sa pihak nga parte, 5th place ro Aklan sa Elementary apang nakabawi sa 2nd runner up sa Secondary ag para games.
First runner-up ro Negros Occidental sa Secondary Regular Sports kamana man sa Para Games.
Ro closing ceremony hay presenteng ginapatigayon makaron nga hapon.
Makabig man nga makasaysayan para sa Negros Occidental ro hinampang bangud nga raya eon ro ulihi nga WVRAA nga andang pagatambungan bangud sa 2026, sa Negros Island Region Association (NIRA) Meet eon sanda magapasakop.
