Kalibo Aklan——–Patay ro sangka 21 anyos nga binatilyo matapos nga magbigti gamit ro eubid nga higot it manok sa Barangay Linabuan Sur, Banga.
Ro biktima nga 21 anyos hay tumandok it Barangay Bay-ang, Batan apang presenteng naga-istar sa nasambitan nga lugar.
Suno sa tiyo it biktima nga si Berting Rufin nga antes matabo ro insidente hay nag-adto pa sa anang baeay ro biktima nga medyo problemado ag nagatangis.
Ginsungbilan na pa sigon raya it pagkaon apang owa raya nagbatun ag nagpamilin bilin eun kana
Owa man sigon nana ginseryoso ro ginhambae it biktima bangud nga una raya sa idaeum it impluwensiya it makahieilong nga ilimnon.
Nasayuran nga naga-isaeahanon nga unga ro biktima ag owa eun naga-istar sa puder it anang pamilya bangud sa ginapahayag nga indi sanda magkasundo it anang ama.
Makapilang beses man sigon rayang ginpilit it anang tiyo nga mag-uli eun sa andang baeay sa banwa it Batan apang nagpamalibad eamang raya.
Dugang pa kara nga owa man raya it may ginasugid nga karelasyon ukon babayi nga ginapangailaan.
Samtang kung may problema ka ag gusto mo it kaistorya,puwedi kang tumawag sa: National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
