Balitang Espesyal ———-Sangka 22-anyos nga estudyanteng eaeaki sa Italy ro nag-viral matapos nga ipa-tattoo sa anang butkon ro barcode it anang COVID-19 certificate.
Suno kay Andrea Colonnetta, owa eon nana ginpag-isipan pa ag insigidang nagpa-tattoo bangud para kana ro anang desisyon hay praktikal ag topical samtang kaistorya ro tattoo artist nga si Gabriele Pellerone.
Sa idaeum nga parte it bukton maeapit sa kili-kili ni Colonnetta makita ro sangka matrix nga itom nga square halin sa QR code it anang opisyal nga Italian green pass.
Ro nasambit nga pass ro magapamatuod it COVID-19 status, kun ro sangka indibidwal hay bakunado, nakarekober eon sa virus ukon nagnegatibo sa test sa sueod it 48 oras.
Umpisa pa ko Agosto 6, sangka EU Digital COVID-19 certificate ro gina- require sa Italy agud nga makasueod sa mga sinehan, museums ag indoor sports venues ukon magkaon indoors sa mga restaurants.
Suno kay Colonnetta, matapos nga nakumpleto ro anang daywang doses it COVID-19 vaccine, hay naisipan nana nga ipa-tattoo ro anang barcode nga umani it maabu nga atensyon sa Instagram ag TikTok, kun sa siin maskin ro anang mga ginikanan hay bukon it kumpurme sa anang gin-obra.
