KALIBO, Aklan—Uman nga nag-apela si punong barangay Neil Candelario it Brgy. Poblacion, Kalibo sa publiko nga likawan anay ro mga matawo nga lugar.
Raya hay bangud nga maka-alarma suno kana ro naging resulta it ginpatigayon nga intensified community testing sa mga residente it Purok 1, C. Laserna St., Kalibo kun sa siin sa 86 nga initial nga result nga gin paguwa it Molecular Diagnostic Laboratory it Aklan Provincial Hospital sa kabilugan nga 299 nga swab specimen nga ginbo-oe hay 22 eagi ro nag positibo.
Ginpatigayon ro RT-PCR test samtang nagapadayun ro ginapatuman nga hard lockdown sa lugar nga nag-umpisa ko Nobyembre 20 agud nga malikawan eon ro pagkalhit pa it makamaeatay nga virus.
Gindugang pa ni kapitan Candelario nga ro tanan nga mga nagpositibo sa sakit hay insigidang gindaea sa gintaeana nga quarantine facility, kun sa siin 19 kara ro nakitaan it sintomas.
Ginaeauman nga masobra sa 500 nga indibidwal ro igapaidaeum sa swab testing sa nasambit nga lugar, apang ginpaiway anay ro mga naga edad it lima panaba ag ginprayoridad ro andang mga ginikanan.
Masobra pa sa 211 ro nakataeanang igapaidaeum sa RT-PCR test.
Full force suno kana ro suporta ag bulig it provincial government ag LGU kalibo sa mga kinahangeanon it mga apektadong residente partikular ro foods packs ag dugang nga covid ligtas center.
Ginpasaeamatan man nana ro tanan nga mga eakot sa ginpatigayon nga intensified community testing sa pagpanguna it Provincial Health Office , kun sa siin suno kana posibleng sa sobrang init it andang suksok nga PPE hay daywang health workers ro nalipong.
Nagpadumdum pa imaw sa mga pumueuyu nga hugut sa gihapon nga sundon ro health protocols agud nga malikawan ro pagtaas it spike it infection sa banwa it kalibo nga makabig eon makaron nga epicenter it sakit.
