KALIBO, Aklan—Hugut nga ginpamalibaran it 23-anyos nga eaeaki nga imaw ro nagbuno sa 41-anyos nga biktima bandang alas-12:00 kaina it tungang gabi-i sa Brgy. Muguing, Banga.
Ro suspek nga si John Errol Gawan, may asawa ag residente it nasambit nga lugar hay presenteng nakakulong sa Banga Municipal Police Station matapos nga ginaturo nga imaw ro nagbuno sa biktimang si Sonny Reprado, 41 anyos ag residente man it nasambit nga lugar.
Ro biktima hay presenteng naka-confine sa Aklan provincial hospital matapos nga mag angkon it ap-at nga igo it pagbuno sa nagkaeain-eain nga parte it anang eawas.
Nagpanawagan man si Gawan sa biktima nga ituro kon sin-o ro nagbuno kana.
Sa pihak kara, haum suno kana imaw nga sabton ro anuman nga kaso nga igapasaka kontra kana.
Natabu ro krimen sa karsada may pilang metro ro eayo sa Muguing Elementary School nga nagapatigayon it alumni homecoming.
Base sa imbestigasyon, nagkagulo sa lugar matapos nga gina alegar nga may naka-away ro manak it biktima sa okasyon.
Bangud kara, gulping ginbuno it suspek ro biktima it makapilang beses partikular sa anang tuo nga dughan ag butkon.
Nagapadayun pa ro imbestigasyon it pulisya sa insidente.
