Ginaboeobanta nga 23,000 nga mga eskwelahan sa nasyon ro owa it principal bangud nga maabu sa mga aplikante ro owa nakapasar sa qualifying examination, suno sa Department of Education (DepEd).
Sa budget hearing it Senate Finance Committee, ginpahayag ni Education Secretary Sonny Angara nga ginatun-an it ahensya nga haeugaan ro National Assessment for School Heads (NASH) agud nga mas maabung aplikante ro maging kuwalipikadong magdumaea sa mga eskwelahan.
Sa idaeum it nasambit nga plano, pagataw-an it kahigayunan ro mga aplikanteng bumagsak sa pilang parte it eksaminasyon nga magpaidaeum sa remediation ag professional development sa baylo nga uman nga magbo-oe it bilog nga exam.
Suno kay Angara, nakabo-oe eon ro DepEd it 6,000 nga posisyon para sa mga principal makaron nga 2026 ag ginapadasigan kara ro pagpuno sa mga bakanteng posisyon.
Samtang, ginpahayag ni DepEd Undersecretary Wilfredo Cabral nga sa masobra sa 45,000 nga eskwelahan sa nasyon, kapin sa 22,000 eamang ro may principal.
Nagakabaeaka si Senate President Sherwin Gatchalian sa kawad-an it nakataeana nga pondo para sa mga bag-ong posisyon it principal sa proposed 2027 budget it DepEd.
Suno sa ahensya, naghinyu sanda it pondo para sa masobra sa 14,000 nga dugang nga posisyon it school principal sa masunod nga dag-on nga ginaboeobanta nga nagakinahangean it ₱10.5 bilyon, apang owa raya nataw-an it alokasyon.
Bilang alternatibo, ginatun-an it DepEd ro pag-promote ukon reclassification it mga manugturo agud nga makabulig nga mapun-an ro mga bakanteng posisyon.
