KALIBO, Aklan—Dismayado nga nagreklamo sa Kalibo Police Station ro sangka 24-anyos nga eaeaki matapos nga gina-alegar nga ginbaligyaan imaw it peke nga alahas online.
Base sa report, nagpost sa anang social media account ro tagreklamo nga naga-usoy imaw it mabak-ean it silver nga kulintas kung siin may nag-comment sigon nga sangka persona.
Dikara sigon nag-umpisa ro transaksyon it daywa hasta sa makumbinsi ro tagreklamo nga bak-eon ro kulintas sa balor nga 400 pesos eamang.
Ginasugid nga naga-abot sa 1,800 pesos ro presyo it kulintas sa mga jewelry store rason nga kat nabaton sigon it tagreklamo ro item hay nagduda raya nga peke ro alahas.
Gilayon pa sigon kara nga tawagan ro anang ka-transaksyon para i-uli ro kulintas apang nagpakamatig-a sigon raya rason nga nagdesisyon imaw nga magdiretso sa taeatapan it pulisya.
Nasayuran nga mahilig magkolekta it mga silver nga alahas ro tagreklamo.
Sa makaron hay ginahueat eon lang ro resulta it ginpatigayun nga pagsikyar it sangka pawnshop agud matumod kung matuod raya nga silver ukon peke.
