KALIBO, Aklan—Humampak eon sa kabilugang 1,618 ro kumpirmadong kaso it Coronavirus Disease 2019 ukon COVID-19 sa bilog nga probinsya it Aklan umpisa nga magtuhaw ro pandemya.
Base sa datus nga ginpagguwa it Aklan Provincial Epidemiology Surveillance Unit it Provincial Health Office, raya hay bangud sa 24 nga panibag-ong nagpositibo sa deadly virus.
Sa nasambit nga numero tig an-om nga kaso ro maghalin sa banwa it Kalibo ag Nabas, lima sa Batan, tig tatlo sa Banga ag Malay samtang sambilog sa Altavas.
Sa pihak kara, may tatlo man nga nagdugang sa listahan it mga nagmayad rason nga sumaka eon sa 1,418 ro total recoveries.
Samtang, nadugangan man it sambilog ro mga namatay rason nga nag-abot eon sa 39 ro total deaths matapos nga dapuan it COVID-19 infection.
Sa makaron, 161 pa ro nabilin nga aktibong kaso nga ginakaeakipan it 141 nga naka-facility quarantined ag 20 nga admitted sa Aklan Provincial Hospital.
