KALIBO, Aklan—Mag-eowas sa pag-eabag sa curfew, arestado man ro sangka eaeaki sa pagpanakaw sa Brgy. Union, Nabas.
Ginkilaea ro suspek nga si Jayson Silva, 25-anyos, tumandok it San Joaquin, Iloilo apang presenteng naga-istar sa Brgy. Nagustan sa nasambit nga banwa.
Base sa report, samtang nagarobing ro tropa it Nabas PNP hay nataeopangdan nanda ro sangka motorsiklo nga nakapark rason nga gin-usisa nanda kon sin-o ro tag-iya kon sa siin insigida man nga nagpaeapit ro driver.
Apang samtang ginausisa it pulisya ro dokumento sa anang behikulo hay nataeopangdan it mga raya ro sangka sako nga anang ginabitbit.
Bangud kara, gilayon nanda nga gin-usisa ro sueod it sako ag dikara tumambad kanda ro sangka stainless elisi it sangka pumpboat.
Kaangot kara, insigidang gindaea it mga otoridad ro suspek sa taeatapan it pulisya kon sa siin imaw sa makaron nakakulong para sa nagakaigong disposisyon.
Samtang sa pihak nga parte, pagkaagahon hay may nagreport sa Nabas PNP kaangot sa insidente ag dikara hay naidentify ro nasambit nga elisi it tagreklamo nga sangka mangingisda.
Sa makaron hay haom nga magpasaka it kaso ro tagreklamo kontra sa nasambit nga suspek.
