KALIBO, Aklan—Arestado ro sangka 25-anyos nga eaeaki matapos ro ginpatigayun nga drug buy-bust operation bandang alas-2:45 kaina it hapon sa Sitio Bay Side, Brgy. New Buswang, Kalibo.
Pinaagi sa gintingub nga pwersa it Kalibo Municipal Police Station ag Provincial Drug Enforcement Unit ukon PDEU-Aklan, madinaeag-on nga nadakpan ro suspek nga si Ed Ivan Hilario, residente it Sitio Baybay sa nasambit nga lugar.
Suno kay Police Lieutenant Colonel Frensy Andrade, head it PDEU-Aklan nga na-rekober sa posisyon ag kontrol it suspek ro sang gramo nga marijuana nga nakaputos sa papel kabaylo P500 nga marked money.
Apang, may nagtuhaw sigon nga tensyon matapos nga matunugan it suspek nga ro poseur buyer hay sangka pulis.
Insigida sigon nga nagdaeagan ro suspek paadto sa mga iskenita hasta sa makaabot raya sa may area it bakhawan.
Nag-abot suno kana sa haeos 20 minutos ro pag-eagas it mga otoridad ag ginkinahang-ean pa nga maggamit it drone agud madasig nga matumod ro lokasyon it suspek.
Nakita pa sa camera nga may mga kaistorya si Hilario sa bahin it Lambingan beach kun siin dikara eon imaw gin-aresto.
Ro nasambit nga suspek hay magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2022.
