Kalibo Aklan ———Nagapabilin nga naka-confine sa Aklan Provincial Hospital ro sangka 26-anyos nga eaeaki matapos nga gin-eabo it kaugalingong amigo sa Sitio Angeles, Brgy. Kinalangay Viejo, Malinao.
Nakaangkon it lastro sa ueo ag likod nga porsyon it eawas ro biktimang si Elmar Francisco matapos nga gin-eabo it makaywang beses it ginatumod nga suspek nga si Aben Gonzales, 30-anyos ag parehong residente it nasambitang lugar.
Suno kay P/Master Sgt. Rufino Equiña it Malinao PNP, kaibahan nga magkainuman ro daywa sa baeay ni Rolando Victoriano kon sa siin nag-usoy it sigarilyo si Gonzales rason nga nagguwa raya kon sa siin nakit-an nana ro manok it tagbaeay ag insigidang gin-eabo.
Bangud kara, nakit-an imaw ni Francisco ag gilayon nga ginsita nga ginkaakig man it suspek.// dikara eon sigon umabot sa punto nga ginbunaean ni Francisco it kahoy si Gonzales nga ana man nga ginbaeosan it pag-eabo.
Duguan eon sigon si Francisco kat nataeopangdan it andang mga kainuman nga insigida man nga gindaea sa nasambit nga hospital para sa anang nagakaigong pagbueong.
Samtang, naaresto man si Gonzales ag presente sa makaron nga nakakulong sa Malinao Police Station para sa nagakaigong disposisyon.
