KALIBO, AKLAN — Nagpaabot it reklamo sa Sangguniang Panlalawigan ro sangka 26 anyos nga eaeaki ag sangka foreigner matapos gin balibaran nga matuli sa provincial hospital.
Mismong gin hayag ni Board Member Emmanuel Sodusta nga kapin sa sang dominggo eon ro nakataliwan kat gin paabot kana ro nasambitan nga reklamo.
Gin pasa-pasahan sigon ro estranghero nga naga bakasyon eamang sa probinsiya ag ku ulihi hay gin balibaran nga matuli sa nasambitang ospital.
Nasayuran nga natigayun man nga matuli ro foreigner apang, gin himo sa pribadong ospital ag nagbayad it kapin sa P3,000.
Bangud sa hitabo, gustong ipatawag ni Atty. Sodusta sa SP ro pamunuan it Dr. Rafael S. Tumbokon Memorial Hospital agud magtao it eksplinasyun angot sa isyu.
Madumduman nga kan-u eamang hay gin patawag man ni Sodusta ro pamunuan it ospital agud sabton ro isyu nga pag-downgrade sa ospital nga ku ulihi hay natigayun man nga mataw-an it kaklaruhan.
