Nagapangatubang sa kasong pag-eabag sa Republic Act 10591 ukon Illegal Possession of Firearms and Ammunitions Act ro sangka 27 anyos nga eaeaki matapos nga madakpan it baril bandang alas-11:40 it gabi-i sa Brgy. Unidos, Nabas.
Nakilaea ro suspek nga si Jophil Danay, caretaker sa sangka piggery ag residente it Brgy. Laserna, Nabas.
Base sa report it Nabas Police Station nga samtang nagapatrolya hay ginparahan nanda ro suspek nga nakasakay sa motorsiklo matapos nga mag-eowas nga nag-eabag sa curfew hour hay owa pa nakasuksok it face mask ag helmet.
Apang sa anang pagpundo hay nataeupangdan it kapulisan nga may nagabukoe sa anang hawak ag sa andang pag-usisa hay nakita ro nakasukbit nga .38 nga baril nga kargado it limang bala.
Matapos nga owa it may maipakita nga mga dokumento, ginkumpiska it pulis ro anang baril.
Sa makaron hay nakakulong ro suspek sa lock up cell it Nabas Police Station.
