Kalibo Aklan ——–Arestado ro sangka 27-anyos nga eaeaki matapos nga madakpan sa ginpatigayun nga drug buy-bust operation it gintingub nga pwersa it Provincial Drug Enforcement Unit (PDEU)-Aklan ag Kalibo PNP bandang alas 4:15 kahapon sa Lambingan beach, Brgy. Andagao, Kalibo.
Narecover sa posisyon ag kontrol it suspek nga si Jerald Esmeralda, residente it Crossing Buswang, Brgy. Poblacion, Kalibo ro sangka mabahoe nga sachet it ginapatihan nga dried marijuana kabaylo it buy-bust money nga 500 pesos.
Ginasugid nga magabakae kunta it bahog para sa anang mga alagang baboy si Esmeralda kat madakpan imaw it mga kapulisan.
Suno kay Mr. Roben Esmeralda, tiyo it suspek, nga dating drug surrenderee si Jerald apang napahilway pinaagi sa plea bargaining.
Gintaw-an sigon imaw it negosyo it anang ina nga presenteng nagatrabaho sa ibang nasyon agud nga magbag-o.
Ginpanindugan man kara nga nagpundo eon sa iligal nga hilimuon ro anang gumankon.
Samtang, sa pihak nga parte, suno kay Police Major Frenzy Andrade it PDEU-Aklan, nga masobra sang dag-on eon nandang gina-mintor si Esmeralda.
Kapin sa tatlong gramo sigon it dried marijuana ro andang narekober sa suspek kahapon.
Maeuwas kara hay nagabaligya man sigon it shabu ro suspek.
Kaeabanan sigon sa mga parokyano kara hay mga estudyante, driver ag anang mga barkada.
Sa andang pagpangusisa sa suspek ginapahayag nga sa syudad it Roxas raya nagabuoe it supply it mga iligal nga droga.
Kaangot kara, gin-engganyo man si Police Major Andrade ro mga naging konsumidor it suspek nga pundohon eon ro andang maeain nga bisyu kamana man nga i-monitor it mga ginikanan ro andang mga unga agud mapaeayo sa peligro.
