Sangka 27-anyos nga eaeaki sa China ro indi mabaton-baton sa anang mga gina-aplayan nga trabaho bangud sa itsura nana nga matsa 10 years old!
Ginakabig nga sangka “blessing” kon ro sangka tawo hay owa nagagueang ro itsura eabi eon sa mga kababayin-an.
Ro iba pa hay nagagastos it mabahoe nga kwarta para sa mga anti-aging treatments ag beauty products agud eang nga mag-itsurang unga.
Apang para kay Mao Sheng nga taga-Dongguan City, Guangdong Province, sangka sumpa ro owa paggueang it anang itsura.
Sa kada naga-apply it trabaho si Mao Sheng, owa it nagapati nga imaw hay 27-years old eon.
Kon ginapakita man nana ro anang birth certificate hay owa gihapon imaw ginabaton sa trabaho bangud nga nahadlok ro mga employer nga maakusahan it pageabag sa child labor.
Nag-viral ro istorya ni Mao Sheng sa bilog nga China kat may nag-post it video sa social media app nga Douyin.
Makita sa viral video nga masyado imaw nga nabudlayan nga makabo-oe it trabaho sa mga factory bangud sa anang itsura.
Bangud kara, naging overnight online sensation si Mao Sheng ag dumagsa ro job offers kana.
Sa makaron, nagatrabaho eon si Mao Sheng sa bulig it sangka businessman nga na-touch sa anang istorya .
Mag-eowas sa job offers, may nag-tanyag man kay Mao Sheng it libreng checkup sa doktor agud nga usisaon kon ano ro anang medical condition agud nga masayuran kon ham-an nga owa imaw nagagueang .
