KALIBO, AKLAN — Kapin sa 274 kilo it mga nagkaeain-eain nga basura ro nabueo sa idaeom it dagat sa ginpatigayong clean-up drive it masobra sa 100 volunteers sa isla it Boracay.
Raya hay kaparte it coral preservation program it Boracay Foundation Incorporated (BFI), grupo it mga negosyante sa isla kaibahan ro Business Administration of Scuba Shops (BBASS) ag Philippine Mermaid Academy kamana man ro LGU-Malay.
Nagbulig man sa paglimpyo ro mga estudyante, mga pulis ag mga residente.
Nakatipon it 274 kilo it mga basura sa sueod eamang it sang oras nga paglimpyo kon sa siin kaabuan kara hay mga plastic, mga upos it sigarilyo ag mga butong.
Katuyuan man it grupo nga mapangalagaan ro mga corals sa isla.
Samtang, nagpanawagan ro grupo sa mga turista ag residente nga pangalagaan ro mga corals sa Boracay nga sambilog sa mga ginadayo sa isla.
Nauna eon kara nga ginpahayag it BFI nga nagiging iresponsabli ro mga turista sa isla bangud sa uwa it pakundangang pagpilak it basura kapin eon ko LaBoracay.
