KALIBO, Aklan—Arestado ro sangka eaeaki matapos nga madakpan it illegal nga armas sa Brgy. Poblacion, Makato.
Ginkilaea it Makato PNP ro suspek nga si Ivy Batoy “alyas ampoy”, 28-anyos ag residente it Brgy. Panayakan, Tangalan.
Base sa report, may sangka concerned citizen nga nagreport sa taeatapan it pulisya angot sa nasambit nga persona nga nagabitbit it armas.
Bangud kara, insigidang nagkasa it checkpoint ro kapulisan kon sa siin antes nga nadakpan si Batoy hay naaksidente raya maeapit sa nakaplastar nga checkpoint it pulisya.
Sa pagresponde it mga otoridad nakit-an ro nakasukbit sa anang kilid ro FMW 35-7 magnum revolver nga loaded it tatlong ammunition.
Si Batoy hay presenteng nakakulong sa locked up cell it Makato Police Station ag nakataeaang magapangatubang sa kasong pag-eabag sa Republic Act 10591 ukon Comprehensive Firearms and Ammunition Regulation Act.
