KALIBO, Aklan – – – Gin saylu makaron ro gina dungkaan it tanan nga biyahe it mga baruto sa Tabon, Caticlan ag Tambisaan, Manocmanoc, Boracay bangud sa mabaskog nga humbak maghalin sa orihinal nga pantalan sa Caticlan ag Cagban.
Suno kay Lt. Commander Ramil Palabrica, hepe it Philippine Coast Guard (PCG)-Caticlan nga ro pagbag-o hay kasunod it insidente it pagsadsad ag pagkueob it motorbanca sa baybayon maeapit sa Cagban port.
Suno sa opisyal nga insigidang naka-responde ro anang mga tawuhan, katuwang ro Boracay Rescue Volunteers ag naeowas ro 28 nga pasahero ag tatlong crew it MBCA Carrolan nga naghalin sa Caticlan Port ag paagto konta sa Boracay.
Gina sugid nga 50 metros ro distansya maghalin sa pantalan kat maghampak ro mga mabaskog nga baeod sa baruto rason nga eubusan rayang nagkaeasamad.
Gin padangat man ro mga pasahero sa ospital nga insigida man nga gin pauli matapos gin paidaeum sa medical check-up.
Samtang, gin klaro ni Palabrica nga owa it naging pagbag-o sa oras it biyahe it mga baruto maghalin alas-6:00 it agahon hasta alas-6:00 t gabie.
